Guverinoma y’u Bwongereza yavuguruye urutonde rw’ibihano byafatiwe abantu n’imitwe ishinjwa guhungabanya umutekano muri Repubulika ya demokarasi ya Congo, yongeraho izina rya Front pour la Refondation de la Nation, FRN, ku mazina y’ihuriro Alliance Fleuve Congo, AFC, risanzwe ryarafatiwe ibihano.
Iri vugururwa ryatangajwe kuri uyu wa Kane, tariki ya 12 Ugushyingo 2026, na Minisiteri y’Ububanyi n’Amahanga y’u Bwongereza.
Icyakora, u Bwongereza ntibwatangaje ibihano bishya byihariye byafatiwe FRN. Ahubwo bwongeye iryo zina ku rutonde rw’amazina ya AFC, isanzwe yarafatiwe ibihano birimo gufatira umutungo wayo.
AFC yashyizwe kuri urwo rutonde tariki ya 17 Nyakanga 2026, hashingiwe ku bihano by’Umuryango w’Abibumbye.
Nk’uko bigaragara mu itangazo ry’ibihano, AFC ishinjwa kubangamira gahunda zo kwambura intwaro abarwanyi ba M23, kubasezerera mu gisirikare no kubasubiza mu buzima busanzwe.
Iri huriro rishinjwa kandi gushyigikira M23 no kugira uruhare mu bikorwa bihungabanya umutekano mu burasirazuba bwa Congo, birimo no gukoresha umutungo kamere, cyane cyane amabuye ya coltan.
Ibyo bihano bisaba ko amafaranga n’undi mutungo by’uwo muryango bifatirwa ahantu hose amategeko y’ibihano y’u Bwongereza akurikizwa.
Abantu n’ibigo by’imari birebwa n’ayo mategeko babujijwe guha uwo muryango amafaranga cyangwa undi mutungo, keretse babiherewe uburenganzira buteganywa n’amategeko.
Iri vugururwa riteye kwibaza ku isano iri hagati ya AFC na FRN, cyane cyane mu gihe havugwa ibikorwa bya FRN mu mirwano ibera mu burasirazuba bwa Congo.
Icyakora, itangazo ry’u Bwongereza ntirisobanura impamvu izina rya FRN ryongerewe ku rutonde rw’amazina ya AFC, cyangwa niba iyo mitwe yombi ihuriye ku buyobozi bumwe.
Kugeza ubu, ikizwi ni uko u Bwongereza bwavuguruye urutonde rw’ibihano byari bisanzwe byarafatiwe AFC, aho gutangaza ibihano bishya byihariye byafatiwe FRN.