Agasaro

Kabila ashobora gutsinda Amerika? Ikiganiro mpaka gikomeye hagati y’abanyamategeko Sagaga na Kambanda

Venuste Nshimiyimana — Sun, 30 Aug 2026 15:40:33 GMT

Uwahoze ari Perezida wa Repubulika Iharanira Demokarasi ya Congo, Joseph Kabila, yajyanye Leta Zunze Ubumwe za Amerika mu rukiko, asaba ko ibihano yafatiwe na Washington bikurwaho.

Amerika ishinja Kabila gutera inkunga no gushyigikira AFC/M23 mu bya politiki. Kabila arabihakana, akavuga ko ibyo birego bidashingiye ku bimenyetso bifatika.

Ariko se umuntu wafatiwe ibihano na Amerika ashobora kubijyana mu rukiko akanatsinda?

Iki kibazo cyateje impaka hagati y’abanyamategeko Charles Kambanda na Ernest Sagaga.

Mu kiganiro twagiranye na Charles Kambanda, yavuze ko Kabila ahanganye n’inzitizi zikomeye cyane mu kugerageza gutsinda Leta ya Amerika kuri ibi bihano.

Ernest Sagaga we arabivuguruza, akavuga ko bidakwiye gufatwa nk’ihame ry’amategeko ko ibihano bya Amerika bidashobora kujyanwa mu nkiko. Agaragaza ko hari imanza zagiye ziregwamo OFAC n’ibyemezo bishingiye kuri IEEPA, aho abafatiwe ibihano bagiye bajuririra ibyemezo bya Leta ya Amerika.

None se ni nde ufite ukuri mu mategeko?Ikiganiro-mpaka kiyobowe na Venuste Nshimiyimana.

“Imfura yanjye nayisize i Mbandaka, ngaruka mu Rwanda”

Venuste Nshimiyimana — Wed, 26 Aug 2026 23:25:20 GMT

Hashize imyaka 29 umubyeyi Alphonsine Munganyinka atandukanye n’umukobwa we, Deborah Niyonsenga, wari ufite imyaka itatu. Batandukaniye i Mbandaka, mu cyahoze cyitwa Zaïre.

Abasirikare b’u Rwanda bamushishikarije gutaha. Yaje gutaha asiga umwana we wari wajyanywe n’umuryango w’Abanyekongo wari wavuze ko ugiye kumwitaho.

Amakuru ya nyuma avuga ko Deborah y…

Kenya yanze ko gahunda yo guteranya ibinyabiziga yongera gusubikwa

Team Agasaro — Wed, 26 Aug 2026 22:17:16 GMT

Kenya yanze icyemezo cy’Umuryango wa Afurika y’Iburasirazuba, EAC, cyo gusubika umwaka umwe ishyirwa mu bikorwa ry’amabwiriza mashya agenga guteranya no gukora ibinyabiziga.

Aya mabwiriza yagombaga gutangira gukurikizwa ku wa 1 Nyakanga 2026. Ariko nyuma y’inama z’abaminisitiri b’imari bo mu bihugu bigize EAC, yimuriwe ku wa 1 Nyakanga 2027.

Agamije kongera umubare w’ibikoresho bikorerwa muri aka karere, guhuza amahame agenga inganda no guteza imbere umusaruro wo muri Afurika y’Iburasirazuba.

Kenya ivuga ko inganda zayo ziteguye kuyashyira mu bikorwa. Nairobi irateganya kwifashisha ihame rya EAC ryemerera ibihugu bimwe gutangira gushyira mu bikorwa gahunda runaka, mu gihe ibindi bikiyitegura.

Tanzania na yo ishyigikiye ko amabwiriza atangira gukurikizwa. Yavuze ko gukomeza kuyasubika bishobora kudindiza gahunda yo guteza imbere inganda muri aka karere.

Ibindi bihugu byo muri EAC bivuga ko bigikeneye igihe. Uganda ivuga ko bimwe mu bikoresho bya moto bitarakorerwa mu karere ku rugero ruhagije. Rwanda n’u Burundi byo byatangaje ko ibikorwa byo gusobanurira ababireba aya mabwiriza bitararangira. Somalia yo iracyakora ibiganiro ku rwego rw’igihugu.

Impaka zibanze cyane ku bikoresho bya moto, birimo amapine, batiri, intebe, feri, insinga n’ibindi. Amabwiriza ateganya igihe cy’inzibacyuho mbere y’uko abakora cyangwa abateranya moto basabwa kwishyura imisoro ku bikoresho bimwe bitumizwa hanze.

Kenya ivuga ko inganda zahawe igihe gihagije cyo kwitegura, kandi ko ibibazo bisigaye byakemurwa amabwiriza yaratangiye gukurikizwa.

Abashyigikiye isubikwa bavuga ko kuyashyira mu bikorwa hakiri kare bishobora kuzamura ibiciro by’imodoka na moto ziteranyirizwa mu karere. Ibihugu bigize EAC byahawe kugeza ku wa 30 Nzeri kugira ngo bigaragaze ibikoresho bitaraboneka mu karere kandi bishobora koroherezwa mu bijyanye n’imisoro.

Kabila yajyanye Amerika mu rukiko: Ese ashobora gutsinda Washington ku bihano yafatiwe?

Venuste Nshimiyimana — Wed, 26 Aug 2026 00:51:07 GMT

Joseph Kabila, wahoze ari Perezida wa Repubulika Iharanira Demokarasi ya Congo, yajyanye Leta Zunze Ubumwe za Amerika mu rukiko, asaba ko ibihano yafatiwe na Washington bikurwaho.

Amerika ishinja Kabila gutera inkunga AFC/M23 no kugira uruhare mu bikorwa bigamije guhungabanya ingabo za Congo. Kabila arabihakana, akavuga ko ibyo birego bidafite ibimenyetso bifatika.

Ariko se, uwahoze ari Perezida w’igihugu ashobora gutsinda Leta ya Amerika mu rubanza nk’uru? Ese urukiko rushobora gutegeka Washington kugaragaza ibimenyetso ishingiraho? Kandi uru rubanza rushobora kugira izihe ngaruka kuri Kabila no ku bibera muri Congo no mu karere k’Ibiyaga Bigari?

Tugiye kubisesengura hamwe n’umunyamategeko Charles Kambanda ukorera muri Leta Zunze Ubumwe za Amerika, unakurikirana ibibazo byo mu karere k’Ibiyaga Bigari.

Imirwano irakomeje muri Kivu: Ni nde ugenzura Fizi, Uvira, Mwenga, Kalehe na Masisi?

Venuste Nshimiyimana — Tue, 25 Aug 2026 16:19:33 GMT

Imirwano ikomeje gukaza umurego mu bice bitandukanye bya Kivu y’Amajyepfo n’iy’Amajyaruguru, nubwo hari amasezerano yo guhagarika imirwano n’ibiganiro by’amahoro bya Washington na Doha. Muri Fizi, Uvira, Mwenga, Kalehe na Masisi, FARDC, AFC/M23 n’imitwe ya Wazalendo baracyahanganye, mu gihe abaturage benshi bakomeje guhunga ingo zabo.

Ni nde ugenzura utu duce? Kuki imirwano ikomeje, kandi FARDC ifite iyihe gahunda yo kurinda abaturage no kwisubiza ibice byafashwe?

Tugiye kubiganiraho na Faustin Baraka Nzangande, umuvugizi wa Wazelendo.

Kabila avuga ko atari akwiye gufatirwa ibihano; Wazalendo bati: “Leta yadutabye mu nama”.

Venuste Nshimiyimana — Mon, 24 Aug 2026 00:31:24 GMT

Uwahoze ari Perezida wa Repubulika ya Demokarasi ya Kongo, Joseph Kabila, yasabye urukiko rw’i Washington gukura izina rye ku rutonde rw’abantu bafatiwe ibihano na Minisiteri y’Imari ya Amerika.
Kabila, wayoboye RDC kuva mu 2001 kugeza mu 2019, avuga ko ibihano yafatiwe muri Mata bishingiye ku birego bitigeze bitangirwa ibimenyetso. Washington imushinja gutera inkunga no gushyigikira mu bya politiki umutwe wa M23, uvugwaho gufashwa n’u Rwanda.
Kabila avuga ko Amerika itagaragaje amafaranga yaba yaratanze cyangwa inkunga ya politiki yaba yarahaye M23. Urukiko rwa gisirikare muri RDC rwamukatiye igihano cy’urupfu adahari, rumushinja ubugambanyi n’ibindi byaha bifitanye isano na M23.
Hagati aho, mu gihe imirwano ikomeje muri Kivu y’Amajyepfo na Kivu y’Amajyaruguru, umwe mu bayobozi ba Wazalendo, Faustin Baraka NZangande, avuga ko kuba FARDC na Wazalendo bakomeje gutakaza ibirindiro biterwa ahanini n’uko Leta ya Kinshasa itabaha ibikoresho bihagije.

“Gen. Muhoozi naba Perezida, umuhungu we Ruhamya azaba Umugaba mukuru w’ingabo”: Frank Mwine

Venuste Nshimiyimana — Sat, 22 Aug 2026 18:56:21 GMT

Perezida Yoweri Museveni yasezereye ku mugaragaro abajenerali 19 ba UPDF, barimo uwahoze ari umugaba mukuru w’ingabo, Jenerali Edward Katumba Wamala, Lt Gen Charles Otema Awany, Lt Gen Charles Angina, ndetse n’uwahoze ayobora iperereza rya gisirikare, Maj Gen Abel Kandiho. Iki gikorwa kiri muri gahunda yagutse yo gusezerera abasirikare barenga 1.800.
Izi mpinduka zibaye mu gihe umugaba mukuru w’ingabo, Jenerali Muhoozi Kainerugaba, arimo kuvugurura inzego z’ubuyobozi bwa UPDF. Zibaye kandi umuhungu we w’imfura, Ruhamya Kainerugaba, yinjiye mu rwego rw’abofisiye ba UPDF nyuma yo kurangiza amasomo mu ishuri rikuru rya gisirikare rya Sandhurst mu Bwongereza.
Ese iri ni isimburana risanzwe ry’abasirikare bageze mu kiruhuko cy’izabukuru, cyangwa ni igice cy’umugambi mugari wo guhindura ubutegetsi no kubusigira umuryango? Turabiganiraho n’umusesenguzi uhoaho wa Radiyo Agasaro Kaburaga, Frank Mwine.

“Mama yatwawe n’Abadaso mu 2022, kuva icyo gihe yaburiwe irengero” — Chantal Uwamahoro

Venuste Nshimiyimana — Wed, 12 Aug 2026 14:27:29 GMT

“Mama yatwawe n’Abadaso mu 2022, kuva icyo gihe yaburiwe irengero” — Chantal Uwamahoro

Mu Rwanda, hashize imyaka ine umubyeyi witwa Jacqueline Nyirambibi avanywe mu rugo rwe n’abashinzwe umutekano bazwi nk’Abadaso.

Jacqueline Nyirambibi, washakanye na Michel Nsekanabo, yari atuye mu mudugudu wa Mabuga ya I, akagari ka Gafunzo, umurenge wa Sake, mu karere ka Ngoma.

Umukobwa we, Chantal Uwamahoro, uba mu Bufaransa, avuga ko kuva icyo gihe umubyeyi we atongeye kuboneka, kandi ko kugeza ubu umuryango utazi aho aherereye.

Muri iki kiganiro cya Agasaro Kaburaga, Chantal arasobanura uko nyina yajyanywe n’urugendo atangiye rwo kumushakisha.

“Gufunga inganda bizagabanya imisoro ariko biramire ubuzima bw’abaturage” — Aimé Muligo Sindayigaya

Venuste Nshimiyimana — Tue, 11 Aug 2026 15:08:57 GMT

U Rwanda rwafunze inganda zirenga 130 zikora ibinyobwa bisindisha, rwambura impushya zo gukora, nyuma y’ubugenzuzi bwakozwe na Rwanda FDA.

Ibicuruzwa by’izo nganda bigomba guhita bikurwa mu maduka no ku babikwirakwiza. Amatangazo n’ibindi bikorwa byo kubyamamaza na byo byarahagaritswe. Abaguzi basabwe guhagarika kunywa ibinyobwa biri ku rutonde rwashyizwe ahagaragara.

Impuguke mu by’ubukungu, Aimé Muligo Sindayigaya, yabwiye Radio Agasaro Kaburaga ko u Rwanda rushobora guhomba imisoro yakomokaga kuri izo nganda, ariko rukungukira ku buzima bwiza bw’abaturage.

Iki cyemezo gikurikiye ikibazo cy’inzoga z’inkorano n’izitujuje ubuziranenge. Minisiteri y’Ubuzima ivuga ko muri uyu mwaka abantu barenga 500 bavuwe ingaruka zatewe n’izo nzoga, hafi 50 barapfa, naho abarenga 100 batakaza ubushobozi bwo kubona.

Ibinyobwa byahagaritswe birimo gin, vodka, whisky, divayi n’inzoga zifite uburyohe bw’igitoki, tangawizi, ikawa cyangwa inanasi.

Rwanda FDA ivuga ko ubugenzuzi bugikomeje. Yanaburiye abacuruzi ko abatubahiriza amabwiriza yo gukura ibyo bicuruzwa ku isoko bazahanwa.

“Umuvandimwe wanjye Jean Bosco Gasasira yarishwe, ndasaba ubutabera”: Moses Musonera

Team Agasaro — Fri, 07 Aug 2026 14:41:02 GMT

Umunyamakuru w’Umunyarwanda Jean Bosco Gasasira, washinze akanayobora ikinyamakuru Umuvugizi, yitabye Imana muri Suwede afite imyaka 48, aho yari amaze imyaka myinshi aba nk’impunzi.

Jean Bosco Gasasira yari azwi cyane kubera inkuru n’isesengura yakoraga ku bibazo bya politiki by’u Rwanda. Yavuye mu Rwanda nyuma yo kuvuga ko yari ahangayikishijwe n’umutekano we bitewe n’ibikorwa bye by’itangazamakuru. Nubwo yari mu buhungiro muri Suwede, yakomeje gukurikiranira hafi amakuru y’u Rwanda n’akarere k’Ibiyaga Bigari.

Mu kiganiro yahaye Radio Agasaro Kaburaga, umuvandimwe we Moses Musonera yemeje urupfu rwa Jean Bosco Gasasira. Yavuze ko umurambo wa nyakwigendera ukiri mu maboko ya polisi ya Suwede mu gihe hagitegerejwe ibyavuye mu iperereza rikomeje.

Musonera yavuze kandi ko Jean Bosco Gasasira yari yarahinduriwe umwirondoro kubera impamvu z’umutekano, bitewe n’ibibazo yari yarahuye na byo mbere.

Muri icyo kiganiro kandi, Moses Musonera yagarutse ku rupfu rw’umuvandimwe wabo, Majoro Chris Bunyenyezi, umwe mu basirikare bakuru bayoboye igitero cya mbere cya FPR cyagabwe ku Rwanda ku wa 1 Ukwakira 1990. Nk’uko Musonera abivuga, Majoro Bunyenyezi yapfuye mu buryo butarasobanuka neza kugeza ubu, kandi umurambo we ntiwigeze uboneka.

Impamvu n’imiterere by’urupfu rwa Jean Bosco Gasasira ntibiratangazwa n’inzego zibishinzwe. Abayobozi muri Suwede bavuga ko iperereza rigikomeje.

Urupfu rwa Jean Bosco Gasasira rusize amateka y’umunyamakuru wagize uruhare mu biganiro mpaka ku bibazo by’u Rwanda, ibikorwa bye bikaba byarakomeje kuvugwaho cyane haba mu Rwanda no mu banyarwanda baba mu mahanga.

Haut du formulaire

Bas du formulaire

"Kuvuga GENOCOST ni ukwigiza nkana no kwibagiza Abatutsi biciwe muri Kongo” — Min. Nduhungirehe

Venuste Nshimiyimana — Mon, 03 Aug 2026 15:11:44 GMT

Mu kiganiro cyihariye na Radio Agasaro Kaburaga, Minisitiri w’Ububanyi n’Amahanga w’u Rwanda, Olivier Jean-Patrick Nduhungirehe, arasubiza Perezida Évariste Ndayishimiye w’u Burundi, wavuze ko FDLR nivaho, u Rwanda ruzaba rutagifite impamvu yo kuguma muri Kongo.

Aravuga kandi ku birego byo gufasha AFC/M23 no kuri GENOCOST, mu gihe Kongo isaba ko amahano yakorewe Abanyekongo yemerwa ku rwego mpuzamahanga. Ati: "Kuvuga GENOCOST ni ukwigiza nkana no kwibagiza Abatutsi biciwe muri Kongo”.

Kinshasa ivuga ko FDLR yemeye gushyira intwaro hasi, gusezerera abarwanyi bayo no kohereza mu Rwanda abemerewe gutaha, ikavuga ko ari intambwe yo gushyira mu bikorwa amasezerano ya Washington. Ariko Kigali ivuga ko iyo gahunda idahagije kugira ngo FDLR isenywe burundu.

U Rwanda rusaba iki? Ni nde uzagenzura intwaro zatanzwe n’abarwanyi basezerewe? Abatahutse bazakirwa bate? Abakekwaho Jenoside bazashyikirizwa ubutabera koko?

Ibibazo 20 bya Venuste Nshimiyimana.

Umuvugizi wa FDLR, Cure Ngoma, Arasobanura Impamvu Bemeye Gushyira Intwaro Hasi

Venuste Nshimiyimana — Sat, 01 Aug 2026 11:20:04 GMT

Guverinoma ya Repubulika ya demokarasi ya Kongo ivuga ko FDLR yemeye gushyira intwaro hasi, gusezerera abarwanyi bayo no kwisesa burundu. Abarwanyi bayo bashobora gusubizwa mu Rwanda cyangwa kwakirwa n’ibindi bihugu, naho abakekwaho Jenoside n’ibindi byaha bikomeye bagashyikirizwa ubutabera.

Ariko haracyari ibibazo bikomeye: FDLR ifite abarwanyi bangahe? Intwaro za mbere zizatangwa ryari kandi zizashyikirizwa nde? Ni uruhe rwego rwigenga ruzagenzura iki gikorwa? Abayobozi bashakishwa n’ubutabera bazatangwa koko? Ese ibisabwa mu rwego rw’umutekano ntibizakoreshwa mu gutinza iyi gahunda?

Mu kiganiro cyihariye na Radiyo Agasaro Kaburaga, umuvugizi wa FDLR, Cure Ngoma, arasubiza ibi bibazo. Arasobanura impamvu bahisemo gushyira intwaro hasi muri iki gihe n’igikorwa gifatika bazakora mu minsi 30 iri imbere, kugira ngo bereke Abanyarwanda n’Abanyekongo ko iri tangazo atari amayeri yo gutinza ibintu.

Kwisesa kwa FDLR ntikwateguriwe mu ishyamba" – Dr Paul Kananura

Team Agasaro — Thu, 30 Jul 2026 19:48:27 GMT

Guverinoma ya Repubulika Iharanira Demokarasi ya Kongo yatangaje ko umutwe wa FDLR wemeye kwambura intwaro abarwanyi bawo no kwisesa burundu, hashingiwe ku masezerano mashya yo kwitanga. Kinshasa ivuga ko bamwe mu barwanyi ba FDLR bazasubizwa mu Rwanda, mu gihe abandi bashobora kwimurirwa mu bindi bihugu byemeye kubakira. Abakekwaho uruhare mu byaha bikomeye bo bazashyikirizwa ubutabera.

Dr Paul Kananura, impuguke mu bya politiki mpuzamahanga n’umutekano, avuga ko inyandiko FDLR yashyize hanze itangaza ko yemeye gushyira intwaro hasi no kwisesa itateguriwe mu mashyamba ya Kongo. Avuga ko ishobora kuba yarateguwe n’abantu bafite ubushobozi bwo kuganira no gufata imyanzuro ku rwego rwa politiki.

Ati: “Uwanditse iyo nyandiko ni na we uzi neza uko ibiyakubiyemo bizashyirwa mu bikorwa. Si inyandiko isa n’iyateguriwe mu ishyamba gusa.”

Dr Kananura anagaragaza impungenge ku hazaza h’umutekano mu karere, avuga ko gusenya umutwe umwe bidahita bikuraho ikibazo cyose. Ati: “Uzatanga undi azamuhitana,” ashaka kugaragaza ko mu gihe hatabayeho ibisubizo bya politiki birambye kandi byumvikanyweho n’impande zose, andi matsinda ashobora kuvuka cyangwa amakimbirane akagumaho.

Yongeraho ko amahoro arambye azaturuka ku biganiro bya politiki no gukemura impamvu zitera imitwe yitwaje intwaro, aho kwishingikiriza gusa ku ngamba za gisirikare.

« Indirimbo Reka nihoreze umwana, reka nihoreze ikibondo ni njye wayihimbye » — Daphroze Munganyinka

Venuste Nshimiyimana — Wed, 29 Jul 2026 14:17:30 GMT

Umunyarwandakazi ufite ubwenegihugu bw’u Bubiligi, Madamu Daphroze Munganyinka, yatangarije Radio Agasaro Kaburaga ko ari we wahimbye indirimbo yamamaye cyane mu Rwanda igira iti: “Reka nihoreze umwana, reka nihoreze ikibondo.”

Madamu Munganyinka yavuze ko yayihimbye akiri umunyeshuri muri Lycée Notre-Dame de Cîteaux i Kigali. Icyo gihe yari yanditse uwo muvugo awujyanye mu irushanwa ry’abanyeshuri.

Yagize ati: “Nari nayanditse nk’igisigo. Sinigeze ntekereza ko uzaba indirimbo izamenyekana mu gihugu hose.”

Yakomeje avuga ko nyuma, Straton Byabagamba wakoraga muri SNEC (Secrétariat National de l’Enseignement Catholique) yamusabye kuwutunganya ukavamo indirimbo, afatanyije n’abanyeshuri bo muri Aba-Saveri ndetse n’abo muri Saint Paul i Kigali.

Yasoje agira ati: “Ni indirimbo nahimbiye abana. Na n’ubu iyo ndi kumwe n’abuzukuru banjye, ni yo nkunda kubaririmbira.”

“Kizito Mihigo wa Kibeho, Umutagatifu duturanye”

Venuste Nshimiyimana — Wed, 29 Jul 2026 13:06:40 GMT

Mu gihe cyo kwizihiza isabukuru y’imyaka 45 Kizito Mihigo yari kuba yujuje ku itariki ya 25 z’uku kwezi, Padiri Jean-Bosco Nsengimana, Umunyarwanda uri mu butumwa muri Argentine, yanditse inyandiko yise “Kizito Mihigo wa Kibeho, Umutagatifu duturanye.”

Muri iyi nyandiko, agaragaza impamvu abona Kizito nk’icyitegererezo cy’ubuzima bushingiye ku kwemera, ku kubabarira no ku bwiyunge.

Twatumiye Padiri Jean-Bosco Nsengimana kugira ngo adusobanurire ibyo yashingiyeho ategura iyi nyandiko, ubutumwa yashakaga gutanga, ndetse n’icyo umurage wa Kizito Mihigo usobanuye ku Rwanda rw’uyu munsi.

Ese u Rwanda rwashobora Gukurikiza Inzira ya Costa Rica Rugasesa Igisirikare?

Venuste Nshimiyimana — Mon, 27 Jul 2026 00:38:58 GMT

Raporo yiswe “Démilitariser le Rwanda : À l’exemple du Costa Rica”, yanditswe n’uwahoze ari Minisitiri w’Ingabo w’u Rwanda, Dr. James K. Gasana, afatanyije na Dr. Nkiko Nsengimana, itanga igitekerezo cy’uko u Rwanda rwatangira gutekereza ku mpinduka z’igihe kirekire zigamije kugabanya buhoro buhoro uruhare rw’igisirikare mu miyoborere no mu mutekano w’igihugu. Raporo ntisaba ko ingabo ziseswa ako kanya, ahubwo isobanura ko igihugu cyakubaka umutekano urambye rushingiye cyane ku baturage, ku miyoborere myiza, ku butabera no ku iterambere, aho kuwushingira gusa ku mbaraga za gisirikare.

Abanditsi batangirira ku kuba u Rwanda rumaze kugera ku ntambwe zikomeye kuva Jenoside yakorewe Abatutsi ihagaritswe mu 1994. Bashimira uburyo igihugu cyongeye kubaka inzego za Leta, kigarura umutekano, kikazamura ubukungu ndetse kikubaka ibikorwa remezo. Ariko kandi bavuga ko uburyo umutekano w’igihugu uteye ubu bukomoka ku bihe by’intambara n’ingaruka za Jenoside, bityo hakaba hakenewe gutangira gutekereza ku cyerekezo gishya gishobora kubaka amahoro arambye.

Raporo itandukanya umutekano wa Leta, ushingiye ku mbaraga za gisirikare, n’umutekano w’umuturage, ushingiye ku burenganzira bwe, imibereho myiza, amahirwe y’ubukungu, ubutabera n’icyizere afitiye inzego za Leta. Ku banditsi, igihugu gitekanye si icyubakiye gusa ku ngabo zikomeye, ahubwo ni icyubakiye ku baturage bafite ubwisanzure, amahirwe angana n’ubuyobozi bubabereye.

Raporo ivuga ko gukomeza gushyira imbere igisirikare bishobora kugira ingaruka ku iterambere. Igaragaza ko amafaranga menshi ashobora kujya mu gisirikare aho kujya mu burezi, ubuvuzi, ubuhinzi n’ibindi bikorwa bifitiye abaturage akamaro. Inavuga ko uruhare runini rw’ingabo mu miyoborere, umwanya muto wa sosiyete sivile ndetse n’ibibazo by’umubano hagati y’u Rwanda n’ibihugu bituranye bishobora gukomeza guteza impungenge.

Abanditsi banagaruka ku bibazo by’umutekano mu burasirazuba bwa Repubulika Iharanira Demokarasi ya Kongo. Bashingiye ku Cyemezo cya Loni No. 2808 cyo mu 2025, cyashimangiye ubusugire bwa Kongo kandi kigasaba ko ingabo z’u Rwanda zava ku butaka bwayo ndetse kikanamagana inkunga ya gisirikare u Rwanda rushinjwa guha umutwe wa M23. Ku bwabo, ibi byerekana ko hakenewe kongera gutekereza ku buryo u Rwanda rwubaka umutekano n’umubano mwiza n’ibihugu bituranye.

Raporo ishingira cyane ku rugero rwa Costa Rica, igihugu cyaseshe igisirikare cyacyo mu 1948. Nk’uko abanditsi babisobanura, icyo cyemezo cyafashije Costa Rica gushora imari mu burezi, ubuvuzi, ubutabera no kubaka inzego za demokarasi. Bagaragaza ko igihugu cyagize ubukungu buhamye, ubuzima n’uburezi bifitiye abaturage akamaro kandi kikaba kimaze imyaka irenga mirongo irindwi kitagira kudeta ya gisirikare.

Icyakora, abanditsi bemera ko u Rwanda rutandukanye na Costa Rica kubera amateka yarwo n’ibibazo by’umutekano mu Karere k’Ibiyaga Bigari. Bityo ntibasaba ko rwakwigana Costa Rica uko yakabaye, ahubwo bavuga ko icyo gihugu gitanga urugero rw’uko umutekano urambye ushobora kubakwa hashingiwe ku nzego za gisivile zikomeye no ku miyoborere myiza.

Raporo isaba ko impinduka zakorwa mu byiciro. Muri byo harimo kugabanya uruhare rw’igisirikare muri politiki, kongera ubushobozi bw’inzego za gisivile zishinzwe umutekano, kubaka polisi ikorera abaturage, gukomeza ubwigenge bw’ubutabera no gufasha abasirikare kubona indi mirimo nyuma yo kuva mu gisirikare. Ibyo byose byakorwa habanje kubakwa ubufatanye n’ibihugu byo mu karere ndetse n’umuryango mpuzamahanga kugira ngo umutekano udahungabana.

Kimwe mu bitekerezo by’ingenzi raporo itanga ni icyo yita “inyungu z’amahoro”, ivuga ko amafaranga yakenerwaga mu rwego rwa gisirikare ashobora gushorwa mu burezi, ubuvuzi, ubushakashatsi, guhanga imirimo y’urubyiruko, guteza imbere ubuhinzi no kurengera ibidukikije. Abanditsi bavuga ko gushora imari mu baturage bishobora kuba ari byo bitanga umutekano urambye kurusha kongera ubushobozi bwa gisirikare.

Raporo isoza ivuga ko ibitekerezo byayo bishobora guteza impaka. Hari abazabona ko ari igihe gikwiye cyo gutangira gutekereza ku Rwanda rw’ejo hazaza, mu gihe abandi bashobora kuvuga ko ibibazo by’umutekano bikigaragara mu karere bituma igihugu kigomba gukomeza kugira ingabo zikomeye. Nubwo yemera izo mpungenge, raporo ishimangira ko impinduka zose zagombye gukorwa buhoro buhoro, zishingiye ku bushake bw’Abanyarwanda no ku bufatanye bw’akarere.

Mu musozo, abanditsi ntibatanga umwanzuro w’uko u Rwanda rugomba gusesa igisirikare, ahubwo bazamura ikibazo cy’ingenzi: ese amahoro arambye ashobora kubakwa neza hashingiwe ku nzego za demokarasi zikomeye, ku butabera, ku iterambere ry’abaturage no ku bufatanye bw’ibihugu, aho gushingira gusa ku mbaraga za gisirikare? Iyo ni yo ngingo nyamukuru raporo ishaka ko Abanyarwanda n’abasesenguzi baganiraho mu gutekereza ku hazaza h’igihugu.

“Ibiganiro Perezida Tshisekedi yifuza ntibireba AFC/M23” — Dr. Oscar Balinda

Venuste Nshimiyimana — Wed, 22 Jul 2026 01:13:42 GMT

Mu kiganiro cyihariye na Radio Agasaro Kaburaga, Umuvugizi wa AFC/M23, Dr. Oscar Balinda, aravuga ko ibiganiro ku rwego rw'igihugu Perezida Félix Tshisekedi aherutse gutangaza bitareba ihuriro AFC/M23, kuko ngo ikibazo cyabo gifite inzira yihariye kirimo gukurikizwa.

Dr. Balinda anavuga ko abaturage bo mu misozi miremire ya Mulenge basigaye bafite ituze n'umutekano nyuma y'imirwano yari imaze igihe ihabera.

Mu Rubuga rw'Abahanzi
Turakira Mme Daphroza Munganyinka, umuhanzi wahimbye indirimbo yamamaye cyane igira iti:

"Reka nihoreze umwana, reka nihirize ikibondo cyanjye."

Aratuganiriza ku mateka y'iyi ndirimbo, ubutumwa buyikubiyemo, n'uko yakiriwe n'Abanyarwanda kuva yasohoka kugeza n'ubu.

Kuki Tshisekedi yemeye ibiganiro? Kuki Irani n'Amerika bavuga ibiganiro intambara igikomeje?

Venuste Nshimiyimana — Sun, 19 Jul 2026 23:00:04 GMT

Ibyo ni byo bibazo turi busubize muri iki kiganiro, dufatanyije n’abatumire bacu: Hon. Enock Ruberangabo, Perezida wa Shikama Banyamulenge de Kinshasa, na Prof. Paul Kananura, impuguke mu bya politiki mpuzamahanga n’umutekano.

Perezida Félix Tshisekedi yatangaje ko yifuza gutangiza ibiganiro ku rwego rw’igihugu bihuza impande zose, agamije gushakira umuti ibibazo bya politiki n’umutekano bimaze imyaka byugarije Repubulika Iharanira Demokarasi ya Kongo. Ariko se, ku baturage bo mu burasirazuba bwa Kongo bamaze imyaka mu ntambara, ubuhunzi n’amakimbirane, ibyo biganiro bishobora koko gukemura intandaro y’ibibazo no kuzana amahoro arambye?

Hagati aho, mu Burasirazuba bwo Hagati, impungenge z’uko intambara yakwira mu karere zarongeye kwiyongera nyuma y’uko abasirikare babiri ba Leta Zunze Ubumwe za Amerika baguye mu gitero cyagabwe ku birindiro byazo muri Yorodaniya, undi umwe akaburirwa irengero. Amerika yahise igaba ibitero bishya kuri Irani, na yo ikomeza kugaba ibitero ku bafatanyabikorwa ba Amerika mu karere. Ese ni gute impande zombi zivuga ko ziteguye ibiganiro, nyamara imirwano ikomeje gukaza umurego?

« Ubutegetsi ntibwanyizeraga; bwatinyaga ko nzabwira amahanga uko imfungwa zifashwe » : Amb. Kabanda

Team Agasaro — Fri, 17 Jul 2026 03:14:16 GMT

Turakira ku nshuro ya kabiri Ambasaderi Célestin Kabanda, mu kiganiro « Abiyemeje kuvuga ukuri kuri Kudeta yo mu 1973 ».
Nyuma ya Kudeta yo mu 1973, Célestin Kabanda yagizwe Perefe wa Perefegitura ya Ruhengeri. Mu mpera z’umwaka wa 1974, yimuriwe kuba Perefe wa Perefegitura ya Gikongoro.
Ahamya ko, nubwo yari afitiwe icyizere kubera ubunararibonye yari afite mu kazi ka Leta, ubutegetsi bushya butamwizeraga. Avuga ko bwatinyaga ko yashoboraga kuzamenyesha amahanga ibyaberaga muri gereza ya Ruhengeri n’uburyo imfungwa zari zifashwe.
Mu 1976, yagizwe Ambasaderi w’u Rwanda muri Libiya. Mu 1979, yagizwe Ambasaderi muri Etiyopiya, anahagararira u Rwanda mu Muryango w’Ubumwe bwa Afurika, OAU.
Mu 1984, yasubiye i New York agirwa Ambasaderi w’u Rwanda mu Muryango w’Abibumbye, Loni, ari ubwa kabiri yari ahawe uwo mwanya. Mu 1988, yagizwe Ambasaderi w’u Rwanda mu Misiri, umwanya yakomejeho kugeza agiye mu kiruhuko cy’izabukuru mu 1991.
Muri iki kiganiro, Ambasaderi Kabanda avuga ko Leta y’u Rwanda yari ifite uruhare rutaziguye mu iyicwa ry’imfungwa za politiki. Ashimangira ko ukuri ku byabaye kugomba kuvugwa no kumenyekana, kugira ngo amateka atazibagirana cyangwa ngo agorekwe.

"Bangize Perefe wa Ruhengeri, mpava ntasuye gereza yari ifungiwemo abanyapolitiki": Amb.C.Kabanda

Venuste Nshimiyimana — Mon, 13 Jul 2026 20:40:43 GMT

Umutumirwa wacu mu ruhererekane rw'ibiganiro bigamije gusobanukirwa ukuri ku Kudeta yo ku wa 5 Nyakanga 1973 ni Ambasaderi Célestin Kabanda, umwe mu bayobozi bakuru bakoranye bya hafi na ba Perezida ba Repubulika ya Mbere. Yabaye Umunyamabanga wihariye wa Perezida Dominique Mbonyumutwa, nyuma aba Umunyamabanga wa Guverinoma ku butegetsi bwa Perezida Grégoire Kayibanda. Mu 1964, afite imyaka 28 gusa, yagizwe Ambasaderi w'u Rwanda muri Leta Zunze Ubumwe za Amerika, anahagararira u Rwanda muri Loni no muri Canada. Yabaye kandi Ambasaderi mu Bufaransa, Libiya, Ethiopia, Misiri no muri Loni inshuro ebyiri. Nyuma ya Kudeta yo mu 1973 yagizwe Perefe wa Ruhengeri, aho avuga ko n'ubwo yari umuyobozi w'iyo perefegitura, atigeze ahabwa uburenganzira bwo gusura gereza yari ifungiwemo abanyapolitiki. Ubu ahishura ibyo yiboneye n'ibyo azi ku bihe bikomeye u Rwanda rwanyuzemo nyuma y'iyo kudeta.